Ulluinnarni TNI-mi, TNI18-imi kiisalu AU/NI2-mi ilinniartunik sullissinermut atatillugu Namminersorlutik Oqartussat Qitiusumik allaffeqarfiani (Qitiusumik allaffeqarfik) una ilitsersuut aqutsisunut sakkussatut eqqarsaataavoq. Aningaasaqarnermut Sulisoqarnermullu Aqutsisoqarfimmi (ASA) Sulisoqarnermut immikkoortortamut apeqqutigineqakkajuttut ilaat ilitsersuummi akiniarneqassapput.

Qitiusumik allaffeqarfimmi immikkoortortaqarfinni ataasiakkaani ilinniartuuteqartoqartarpoq, taamaattorli ASA-mit akissarsitinneqartarlutik. Taamaalillutik immikkoortortaqarfiit ataasiakkaat ilinniartumut atatillugu aqutsinermi pissutsinut tamanut akisussaaffeqarput, tassunga ilanngullugit sulisoqarnermut maleruagassanut tamanut tunngasut eqquutsinneqarnissaat. Ilinniartut sulisutulli allatut pineqarnissaat eqqaamassallugu pingaaruteqarpoq, qaangiuttoornerli pineqartillugu malittarisassat immikkut ittut atuuttarput.

Ilinniartut eqqarsaatigalugit aqutsisut ataasiakkaat atugarisanut tamanut akisussaasuunerat, akissarsiaqartitsinerlu taamaallaat ASA-mit isumagineqartartoq erseqqissassallugit pingaaruteqarpoq.

Namminersorlutik Oqartussani - Qitiusumik Allaffeqarfimmi ilinniartuuteqartarnermut atatillugu apeqqutigineqarnerpaasartunut akissutit uani atuakkit.

Ilitsersuut una atuareerlugu apeqqutitit akineqarsimanngippata ASA-mut saaffiginninnissannut tikilluaqqusaavutit.