Pikkorissartitsinermi kalaallit aqutsisut kulturinilu allani aqutsisut akornanni naleqartitat attaveqaqatigiinnerillu assigiinngissutaat annertuut paasilissavatit.

Ilinniartitsinermi illit nammineq ulluinnarni assigiinngisitaartumik avatangiisilimmi aqutseriaatsit suleqatigiinnerillu ilungersunartitatillu atussavagut. 

Kulturit assigiinngissutaat assigiinngisitaanerlu qanoq pitsaanerpaamik naleqqussarfigisinnaaneritit iluaqutigisinnaaneritillu paasiniarlugit Kalaallit Nunaanni nunanilu tamalaani teoriit ilisimatusarnerlu aallaavigissavagut.

Pikkorissartitsineq 10 ECTS-pointinik naleqarpoq apeqqutillu pingaarnerit pingasut uku tunngavigineqassallutik:

-              Kalaallit aqutsisuisa suut naleqartitaraat?

-              Kulturi suua, aamma sooq aqutsisutut sulinitsinni taanna aallaavigisinnaavarput?

-              Suliffeqarfimmi assigiinngitsunik kulturilimmi qanoq aqutsisoqassava, attaveqaqatigiittoqassava suleqatigiittoqassavalu?

Kulturit assigiinnginnerisa aqutsinermut, suleqatigiinnermut minnerunngitsumillu akerleriissutsinut annertuumik sunniutaat nalunanngitsumik tupaallaatigalugit paasilissavatit.

Ilinniartitsineq ilinniartitsivissanut pingasunut agguataarneqassaaq: auditoriami, laboratoriami suliffeqarfimmilu. Siullermi teori assersuutillu saqqummiunneqassapput. Laboratoriami teori inuunermi atugassanngortinniarsarissavarput. Suliffeqarfimmi pineqarpoq illit nammineq suliffiit, tassani assersuutigalugu nakkutilliinermik, apersuinermik misilittaanernillu suliassanik aalajangersimasunik suliaqassallutit.

Taamaattumik illit nammineq ilinniarniarninni ilinniaqatillu suleqatigalugit ilanngussaqartarnissat aamma naatsorsuutigineqarpoq.

Oqaatsit
Ilinniartitsineq danskisut ingerlassaaq, eqimattakkaarlunili sulinermi oqallinnermilu nammineq oqaatsit atorusutat atorneqassapput.

Pikkorissartitsinermi atuagassat danskisut tuluttullu allassimassapput.

Pikkorissartitsinermi siunertaavoq kulturimut paasisimasaqarnerulernissamut ilisimasanik, naammassisinnaasanik piginnaasanillu pissarsinissat taamaalillutillu suliffeqarfinnut, suleqatigiinnut ataasiakkaanullu, assigiinngitsunik kulturilinnut tunngatillugu aqutsisutut unammillernartut aalajangersimasut paasisinnaalernissaat.

Illit aqutsisutut – teorii suleriaaserlu tunngavigalugit – kulturini assigiinngitsuni aqutsisuunermi illit nammineq aqutseriaatsit qanoq ineriartorissinnaanerit qitiutissavarput. Aamma inunnik allatut kulturilinnik aqutsinermi suleqateqarnermilu illit nammineq periarfissavit paasisinnaanissaannut ineriartortissinnaanissaannullu sakkussaqalissaatit.

Pikkorissartitsinerup aaqqissuussaanerani sammisat pingaarnerit makkuupput:

• Kulturimik paasisimasaqarneq – nammineq suliffeqarfimmut suleqatigisanullu tunngatillugu kulturinik paasiniaaneq (culture mapping)
• Attaveqatigiinnermik, utertitsiviginnittarnermik, tatiginninnermik, aalajangiinernik, piffissamik aqutsinermik aamma

suliffeqarfinni assigiinngitsunik kulturilinni kajumissaarinermut tunngasunik aqutsinerit

• Suliffeqarfimmi assigiinngitsunik kulturilimmi aaqqiagiinngissutsinik nalerisaaneq
• Suleqatigiinnik assigiinngitsunik kulturilinnik aqutsineq

Sammisat suliarineqartut taamaattumik ukuussapput:

• Suliffeqarfinni kulturi
• Sulinermi ilinniarneq
• Kulturinik Paasiniaaneq
• Kalaallit aqutsisuisa naleqartitaat suuppat?
• Kalaallit Nunaannut atatillugu assigiinngitsunik kultureqarluni attaveqaqatigiinneq suleqatigiinnerlu.
• Ungasianiit aqutsineq, aaqqiagiinngissutsinik nalerisaaneq aamma CQ suliffeqarfimmi kulturitut

Sullinniakkat
Assigiinngitsunik kulturilimmi aqutsineq aamma suleqatigiinnerit ingerlasarneri ilinnut suliffeqarfimmi assigiinngisitaartuusumi assigiinngitsunillu kultureqarfiusumi aqutsisutut piginnaasavit patajaallisarnissaanut kissaateqartumut tulluartuuvoq. Pikkorissartitsineq ilinnut imatut inissisimasumut sulisumullu tulluarpoq:

• Kalaallit Nunaanni assigiinngitsunik kulturilimmi aqutsisoq.
• Nunat kulturillu assigiinngitsut akornanni aqutsisoq.
• Pisortat namminertortullu suliffeqarfiutaanni aqutsisoq.
• Suliffeqarfimmi assigiinngisitaarfiusumi kulturikkullu suleqatigiiffiusumi aqutsisoq, suleqatigiinni aqutsisoq suliniummullu aqutsisoq.

Akuerineqassaguit ilinniarnertuunngorniarfimmi, inuussutissarsiummut attuumassutilimmut ilinniakkamik tunngaviusumilluunniit inersimasunut ilinniakkamik attuumassutilimmik (GVU) naammassisimassaatit minnerpaamillu ukiuni marlunni inuussutissarsiummik misilittagaqarsimassallutit.