Pisiortortarnermut Immikkoortortaqarfik

Pisiortortarnermut Immikkoortortaqarfiup neqeroorutit aamma Namminersorlutik Oqartussat sinnerlugit nioqqutissanut sullissinernullu isumaqatigiissutisiornerit neqerooruteqartitsisarnerillu isumagisarpai. Immikkoortortap siunertaa tassaavoq Namminersorlutik Oqartussat isumalluutaannik isumatusaartumik atuinissap qulakkeerneratigut pisiortornerup pitsaanerulernissaa qulakkeerniarlugu unammisinnaanerutinniarlugulu pisiortornerup pisariinnerulernissaa.

Pisiortortarnermut Immikkoortortaqarfik qitiusumik immikkoortortaqarfiuvoq, Namminersorlutik Oqartussani tamani atuutsinneqarsinnaasunik tunngaviusunik isumaqatigiissusiortarluni. Tunngaviusumik isumaqatigiissutit taakkua Namminersorlutik Oqartussat pisiortornermut aalajangersagaat inatsisillu naapertorlugit suliarineqartarput. Namminersorlutik Oqartussani immikkoortortaqarfinni tamani ataatsimoorlutik niuertarpata, annertunerusumik periarfissaqalissaagut taamaalillutalu iluaqutaasunik isumaqatigiissusiorsinnaasarnissaq angussallugu. Taamaattumik Pisiortortarnermut Immikkoortortaqarfiup Namminersorlutik Oqartussanilu immikkoortoqarfinni tamani suleqatigiinnikkut angusaqarfiussaaq.

Namminersorlutik Oqartussanut tamanut sullissinissamut isumaqatigiissusiornerit saniatigut Pisiortortarnermut Immikkoortortaqarfik Naalakkersuisoqarfinnut immikkoortortaqarfiinullu pisiortugassaannut atatillugu ikiuunnissamut, siunnersuinissamut pisiassalluunniit pillugit kikkunnulluunniit, piumasunut pisariaqartitsisunulluunniit oqaloqateqarnissamut piareersimavoq.  Immikkoortortaq Namminersorlutik Oqartussani pisiortortarneq pillugu suleqateqarluarusuppoq, atuisummi suleqatiginerisigut pitsaanerpaanik isumaqatigiissusiortaratta kiisalu tunngaviusunik isumaqatigiissusiornissamut allatigulluunniit pitsanngoriaatissanut siunnersuuteqarfigineqarusulluta.

Nanushop

Pisiortortarnermut Immikkoortup Nanushop akisussaaffigaa, taannalu pisariillisaanermut periusissap ilagaa pingaarutilik. Namminersorlutik Oqartussat Nanushoppiat tassaavoq sulisut nioqqutissanik Namminersorlutik Oqartussat pilersuisunik isumaqatigiissusiorfigisimasaaneersunik pisiniarfigisinnaasaat. Immikkoortortap Nanushoppimut siunertaraa Namminersorlutik Oqartussat pisiortornissamut isumaqatigiisutaasa ataatsimoortinnissaat isumaqatigiissutillu sumiiffimmi ataatsimi pissarsiariuminartuutinnissaa. Namminersorlutik Oqartussani sulisut tunisassiat eqqortut eqqortunik akilerlugit matumani pisiarisassavaat.

Nanushop pisortat oqartussaqarfiinit suliffeqarfiinillu allanittaaq isumaqatigiissutini peqataasunit iserfigineqarsinnaavoq. Tamanna pillugu paasisaqarfiginiarukku allaffik attavigiuk.

Neqerooruteqartitsinermut nittartagaq

Neqeroortitsinermut nittartagaq Pisiortortarnermut Immikkoortortaqarfiup akisussaaffigaa, pisortat ataatsimoorlutik neqerooruteqartitsinermut nittartagaat, tassanilu neqerooruteqartitsinermut inatsit naapertorlugu neqeroortitsinerit tamarmik ikkunneqartassallutik. Neqeroortitsinermut nittartakkami neqeroortitsinerit atuuttut, saqqummertussat naammassereersullu takuneqarsinnaapput. Namminersorlutik Oqartussat pisiortornissamut pilersaarutaa neqeroortitsinertut saqqummertussatut ukiut tamaasa saqqummiunneqartarpoq.

Pisiortortarnernut Immikkoortortap makku akisussaaffigai:

• Namminersorlutik Oqartussani pisiortortarnermut tunngaviusut pingaarnerit
• Nioqqutissanut sullissinernullu atatillugu Namminersorlutik Oqartussanut tamanut tunngaviusumik isumaqatigiissusiorneq isumaqatigiissuteqarnerlu
• Qitiusumik ataqatigiissaarineq pisiortortarnermillu nakkutilliisarneq, matumani Namminersorlutik Oqartussanut pisiortornissamut pilersaarutip ukiumoortup suliarinissaa ilanngullugu eqqarsaatigalugu
• Pisiortornissamut, neqeroortitsinissamut isumaqatigiissutinullu maleruagassiorneq immersugassiornerlu
• Pisiortornissamut ilitsersuusiorneq
• Isumaqatigiissusioqqittariaqarsinnaanernik misissuineq
• Namminersorlutik Oqartussat isumaqatigiissutaannik ingerlatsineq nalinginnaasoq
• Pisiortorneq pillugu kaajallaasitap malitseqartinneqarnera
• Isumaqatigiissutinik tunniussineq pillugu kaajallaasitap malitseqartinneqarnera
• Pisiortornissamut suliani ikiuunneq
• Neqeroortitsinermut nittartagaq - Ingerlatsineq nalinginnaasoq nutarterinerillu naapertuuttut, neqerooruteqartitsinermut inatsit takuuk.
• Nanushop - Ingerlatsineq nalinginnaasoq aamma tunisassianik isumaqatigiissutinillu nutarterineq

Pisiortortarnermut Immikkoortortap neqeroorutigai:

• Neqeroortitsineq nioqqutissanillu pisiortorneq pillugit siunnersuineq, kiisalu atortussat missingiutillu pitsaassusaannik qulakkeerineq
• Pisiortornermut atatillugu inatsit eqqortoq, assersuutigalugu neqerooruteqartitsinermut inatsit, pillugu siunnersuineq
• Neqeroortitsinermut nittartakkamut ikiuunneq, ass. nittartakkami neqeroortitsinermik ikkussineq
• Nanushoppimut ikiuunneq, ass. saaffiginnissutinik akissuteqartarneq, atuisunik akuersineq, Nanushoppimik atuinissamut ikiuunneq il. il.

Inatsisit kaajallaasitallu

Pisiortortarnermut Immikkoortortaq neqerooruteqartitsinermut inatsip, Pisiortortarneq pillugu kaajallaasitap kiisalu isumaqatigiissutinik tunniussinissaq pillugu kaajallaasitap kungunerisassaanut ulluinnarnilu suliassanut atatillugu Namminersorlutik Oqartussat ikiornissaannut akisussaasuuvoq.

Neqerooruteqartitsinermut inatsit

Pisortat suliffeqarfinnilu nioqqutissanik kiffartuussinernilluunniit pisortat pisineri 500.000 kr.-inik sinnerlugilluunniit akillit pillugit periutsit neqerooruteqartitsinermut inatsimmi aalajangersarneqarput.  

Neqerooruteqartitsinermut inatsimmi § 2  naapertorlugu nioqqutissanik kiffartuussinernilluunniit pisinerit 500.000 kr.-inik sinnerlugilluunniit akillit tamarmik neqeroortitsinikkut pissapput – atuutinngitsut pillugit paasissutissat neqerooruteqartitsinermut inatsimmi § 2-mi Imm. 2-mit Imm. 5-imut kiisalu § 3-mi atuarneqarsinnaapput.

Akikinnerusunik pisinerit uteqqiattut taamaattumillu siumungaaq naatsorsuutigineqarsinnaasut  isumaqatigiissutitaat qaammatinit aqqaneq marlunnit sivisuneruppata § 5 naapertorlugu inatsimmi ilanngunneqarput. Pisiortorneq ukiuni sisamani tunngaviusumik isumaqatigiissuteqarnikkut pisiarineqartoq, ukiumut pisiortorneq 125.000 kr.-inik amerlanerusunilluunniit akeqarpat neqerooruteqartitsisussaatitaaneq atorneqassaaq. 

Pisiortortarnermut Kaajallaasitaq

Naalakkersuisut qitiusumik allaffeqarfianni tassanilu immikkoortortani nioqqutissanik kiffartuussinernillu pisinerit 250.000 kr.-inik amerlanernilluunniit akillit Pisiortortarnermut Kaajallaasitami aalajangersarneqarput. 

Naalakkersuisoqarfiit akornanni pisiortornissamut pilersaarut ukiumoortup suliarineqarnera Pisiortornermut Kaajallaasitami § 8 naapertorlugu Pisiortortarnermut Immikkoortortaqarfiup ataqatigiissassavaa, taannalu Neqeroortitsinermut nittartakkatigut tamanut saqqummiunneqassaaq. Naalakkersuisoqarfiit immikkoortortaqarfiiniluunniit ataasiakkaani nioqqutissanik sullissinernilluunniit 250.000 kr.-it sinnerlugilluunniit akilinnik ukiup tulliani pisinissamut pisariaqartitat misissornissaannut Naalakkersuisoqarfiit akisussaasuupput.  

Naalakkersuisoqarfiit nioqqutissanik kiffartuussinernilluunniit 500.000 kr.-inik amerlanusunilluunniit akilinnik ukiup ingerlanerani pisinerit kaajallaasitamilu § 8 naapertorlugu nalunaarutigineqarsimanngitsut pillugit Pisortortarnermut Immikkortortaqarfimmut ilisimatitsisussaatitaapput.   

Pisiortornermut kaajallaasitami § 10 naapertorlugu pisinerit Pisiortornermut kaajallaasitami pineqartut 250.000 kr.-illu sinnerlugit akillit  unammeqatigiissutigisinnaanngortinneqassapput, neqeroortitseriaaserlu eqqortoq toqqarneqassalluni, ass. neqeroorutinik piniarneq.

Isumaqatigiissutinik Tunniussisarneq pillugu Kaajallaasitaq

Namminersorlutik Oqartussani nioqqutissanik sullissinernillu pisinermut tunngasoq isumaqatigiissutinik naapertuuttunik tunniussinissamut tunngavissat Isumaqatigiissutinik Tunniussisarneq pillugu Kaajallaasitami aalajangersarneqarput pisiortortarnermut tunngasut pisariillisarniarlugit.

Naalakkersuisoqarfiit Isumaqatigiissutinik Tunniussisarneq pillugu Kaajallaasitaq naapertorlugu nioqqutissanik kiffartuussinernillu pisinermut atatillugu isumaqatigiissutit naapertuuttut tamaasa, matumani IT-mut oqarasuaatilerinermullu tunngasut ilanngullugit, assilinerannik Pisiortortarnermut Immikkoortortaqarfimmut tunniussissapput.

Isumaqatigiissutit

Nioqqut kiffartuussinerilluunniit piniarneqartoq pisiortornissamut isumaqatigiissummeereerpat, Namminersorlutik Oqartussat allalluunniit pisortatigut oqartussaasut isumaqatigiissummi peqataasut isumaqatigiissummik atuisussaatitaapput. 2022-mut isumaqatigiissutini makku ilaapput:

*Digitaliseeriinermut Aqutsisoqarfimmik taannaluunniit peqatigalugu isumaqatigiissuteqarnerit.

MALUGIUK! IT-kkut ajutoorneq pissutigalugu isumaqatigiissutit Nanuaqqami takuneqarsinnanngillat. Pisiortortarnermut Immikkoortortoqarfik isumaqatigiissutit pillugit paasissutissanik Nanushoppimut ikkussuileruttorpoq. Paasissutissat amigarsorigukkit Pisiortortarnermut Immikkoortortaqarfimmut attaveqarnissamut qinnuivigineqarputit.

Pisiortortarnermut Immikkoortortoqarfik e-mailikkut oqarasuaatikkulluunniit attavigineqarsinnaavoq:

indkoeb@nanoq.gl

+299 34 55 64 (ulluinnarni 10-15)

Skabelonit

Pisiortortarnermut Immikkoortortoqarfik pisiortornermut, neqeroortitsinermut isumaqatigiissusiortarnermullu atorneqarsinnaasunik arlalinnik immersugassiorsimavoq. Allanngortoqartillugu immersugassat nutarterneqartassapput.

• Siumoortumik piukkuNeqeroortitsinermut piumasaqaatit
• Neqeroortitsinermut piumasaqaatit – Tamanut neqeroortitsineq
• Neqeroortitsinermut piumasaqaatit – Killilimmik neqeroortitsineq
• Neqeroortitsinermut piumasaqaatit – Isumaqatiginninniarnertalimmik neqeroortitsineq
• Kalaallit Nunaanni Namminersorlutik Oqartussani neqeroortitsinermut uppernarsaat
• Siunnersorteqarnermut isumaqatigiissut nalinginnaasoq
• Nioqqutissanik pisineq pillugu isumaqatigiissut